LAOAG CITY – Naragsakan ni Gob. Matthew Marcos Manotoc iti kaadu dagiti kompania a nagresponde iti awis ti Provincial Government of Ilocos Norte iti babaen ti Investment Office a makipaset dagitoy iti investment conference a naisayangkat idiay Ascott Bonifacio Global City, Taguig.
Inbatad ti gobernador a daytoy ti kaunaan a gundaway nga adda ti isayangkat ti gobierno probinsial kangrunaanna ti Investment Office nga aktibidad iti ruar ti probinsia.
Nupay kasta, kunana a dakkel a pagyamananna ta pinatgan dagitoy ti awis ti probinsia kadakuada.
Naammoan a karaman kadagiti nagresponde ni Thai Ambassador Tull Traisorat ken dagiti pannakabagi dagiti embahada ti Estados Unidos, China pakaibilangan dagiti sumagmamano nga ahensia kas iti Department of Trade and Industry (DTI), Tourism Infrastructure And Enterprise Zone Authority (TIEZA) ken dagiti naruay a pribado a kompania.
Inpannakkel ti gobernador a ti Ilocos Norte ket napintas a pangipasdekan ti negosio nangnangruna ket maikunsiderar a “gateway” dagiti pagilian ditoy Asya.
Malaksid iti daytoy, inbatadna a ti Ilocos Norte ti kakaisuna nga erupuerto iti amianan ti Clark, Pampanga nga addaan ti international airport.
Inlawlawagna nga iti agdama ket adda ti sumagmamano a flights iti inaldaw ken mangnamnama nga iti mabiit ket maisubli manen dagiti international flights.
Kagiddan daytoy, inpakaammo ni Gob. Manotoc nga adda pay ti plano nga adda ti malukatan a “large scale casino” pakairamanan ti golf course iti gagem nga ad-adda pay a maipadur-as ti turismo ditoy probinsia.
Kunana nga awan met ti problema dagiti negosiante iti linak, urnos ken talna agsipud ta mabigbig ti Ilocos Norte kadagiti kalinakan ken kaurnuson a lugar ditoy pagilian.
Innayonna a malaksid iti investment office ken sindadaan a tumulong kadagiti interesado a mangipasdek ti negosioda ditoy probinsia.
