LAOAG CITY – Inlawlawag ni Governor Cecilia Araneta-Marcos no apay a saan a napan nagatendar iti maikapat nga State of the Nation Address ni President Ferdinand Marcos Jr. iti laksid nga adda ti imbitasyon na.
Segun kenkuana, masapol nga adda ti agbati ditoy probinsia bayat ti kaawan dagiti sumagmamano nga opisyal.
Kunana a nakasagana payen ti pagbadona para iti State of the Nation Address ni Presidente Marcos ngem saan a nagtuloy gapu ta adda ti panagdanagna iti mapaspasaran a napigsa a tudo iti baet nga awanen ti bagyo.
Kabayatanna, inbatadna nga adda ti direktiba na kadagiti Local Government Units a no napigsa ti tudo iti masakupan da a lugar ket dagiti Chief Executives wenno dagiti mangidadaulo iti Department of Education ti mangkanserar ti klase.
Segun kenkuana, maobserbaran nga adda dagiti gundaway a napintas ti sasaaden ti panawen iti sumagmamano nga ili wenno ciudad idinto a ti dadduma a lugar ket agpaspasar ti napigsa a tudo isut gapuna a nasaysayaat no dagiti maseknan a Local Government Units ti agdesisyon.
Innayon na a no adda ti pagsenyalan ti bagyo ken no adda protocol ket isu ti panangiyetnag na iti pammilin no adda serrek wenno awan kadagiti pagadalan ken kadagiti pangopisinaan iti gobierno.
