LAOAG CITY – Inbatad ti Department of Education (DepEd) a naapektaran dagiti agarup 8,000 a pagadalan ken 6 a milion nga estudiante iti intero a pagilian ti naapektaran iti tudo ken layus gapu iti agsasaruno a bagyo ken ti Southwest Monsoon wenno Habagat.
Pakairamanan ditoy dagiti tropikal a Bagyo Luis ken Maymay, agraman ti napipigsa a Habagat, a nakaigapuan ti nakaro a layus ken panagreggaay ti daga.
Kas resulta, sumagmamano a lugar ti nangsuspenso ti klasena iti sumagmamano nga aldaw, a kasapulan a suktan dagiti eskuelaan ti napukaw nga aldaw ti panageskuela.
Kinuna ni Education Secretary Sonny Angara nga agarup 1/5 daytoy iti dagup a bilang dagiti pagadalan ditoy pagilian. Nupay kasta, saan pay a kompleto dagiti report ti DepEd isu a mabalin nga umadu ti bilang.
Segun iti sekretario, ti baro a tallo a termino nga akademiko a kalendario ket addaanen iti umdas nga oras para kadagiti estudiante a mangsukat kadagiti aldaw a napukaw gapu iti pannakasuspenso ti klase.
Iti kaudian a situational report ti DepEd, 217 pay laeng a pagadalan ti maar-aramat a kas evacuation center para iti nasurok 6,400 a pamilia.
Mapattapatta a P32.69 milion ti kasapulan para iti cleaning and clearing operations iti 1,157 nga eskuela.
Malaksid iti daytpy, P192.86 milion ti kasapulan para iti pannakatarimaan ti 3,936 a nadadael a pagadalan.
Nairekord dagiti kaaduan a naapektaran a pagadalan iti Ilocos Region, sinaruno ti Central Luzon ken Cordillera Administrative Region.
