LAOAG CITY – Naarestar ti maibilang kas High Value Individual ditoy probinsya iti naisayangkat nga anti-illegal drug buy-bust operation iti Barangay Salbang iti ili ti Paoay babaen ti nagtitipon a pwersa ti Philippine Drug Enforcement Agency Regional Office, Ilocos Norte Police Provincial Office – Provincial Drug Enforcement Unit (INPPO-PDEU), Paoay Police Station, ken ti Regional Intelligence Unit – Provincial Intelligence Team.
Nabigbig ti subject ti operasyon a ni alias Marlon, addaan ti umno a tawen ken residente iti ili ti Pinili.
Nakumpiskar manipod iti suspek ti agdagsen ti sumuruk-kumurang a 51 a gramo ti maipagarop a shabu ken mapatta-patta nga agbalor daytoy iti P346,800 a pisos.
Iti agdama, maisagsaganan ti kaso a panaglabsing iti Section 5 ken Section 11 ti Republic Act 9165 wenno Comprehensive Dangerous Dugs Act of 2002 a maipila kontra iti suspek.
Nagtalinaed ti suspek iti Philippine National Police iti ili ti Paoay.
