LAOAG CITY – Kinanselar ti House Committee on Good Government and Accountability ti maika-walo a hearing ita nga aldaw, Nobiembre 29 mainaig iti Confidential Fund iti Office of the Vice President ken ti Department of Education iti babaen ti panangidaulo ni Bise Presidente Sara Duterte.
Segun iti chairman ti komite, a ni Manila 3rd District Rep. Joel Chua, ti panggep ti desisionda ket tapno masigurado a makikoordinar ni Vice Pres. Sara iti subpoena ti National Bureau of Investigation (NBI).
Kinuna ni Chua, ammoda nga us-usaren ti Bise Presidente ti Senate Blue Ribbon Committee hearing kas rason tapno makaaliklik iti iwayat nga imbestigasion ti National Bureau of Investigation.
Pinasingkeddan ni Chua a napateg ti imbestigasion ti National Bureau of Investigation iti pangta ni Vice President Sara iti presidente, First Lady Liza ken House Speaker Martin Romualdez gapu ta mangpapeggad daytoy iti nailyan a seguridad.
