LAOAG CITY – Naglikodan ti Appropriations Committee Vice Chairman Rep. a ni Jil Bongalon ti alegasion ni Bise Presidente Sara Duterte seknan iti di umiso a pannakataming ti badyet idi sekretario pay laeng daytoy ti Department of Education.
Gapu iti daytoy, kalikaguman ni Bongalon ti accountability ken transparency seknan iti daytoy.
Segun ken ni Bongalon, no adda dagiti isyu ti badyet, apay a kalmado ita, nalaka laeng a pabasolen ti sabsabali.
Maibasar iti statement nga inaramid ni Vice Pres. Sara Duterte, di umiso ti pannakataming ti badyet ti gobierno a naidetalye iti General Appropriations Act a mangipakpakita iti kinaawan episiente na ken saan a nasolbar nga isyu iti nagduduma a departamento.
Segun iti bise presidente, nupay pinadasna nga ilinteg ti nadakamat a problema ket awan ti naawat na a suporta ken awan ti nagbaliwan na.
Kinarit ni Bongalon ti Bise Presidente no apay a saan na a maidanon ti pakaseknanna idi isuna pay laeng ti sekretario ti Department of Education.
Binigbig pay ni Bongalon ti saan a nasolbar nga isyu iti panangidaulo ni Vice Pres. Sara iti Department of Education, espesipiko ti nakapuy a performance ti Pilipinas iti 2022 Program for International Student Assessment (PISA).
Inpettengna nga adda dua a tawen ti Department of Education a mangpasayaat iti proficiency level dagiti estudiante ngem nagtalinaed a naud-udi ti pagilian iti intero a lubong.
