LAOAG CITY – Ikarkarigatan ti kontraktor a leppasen ti bypass bridge iti kabiitan a panawen wenno sakbay iti deadline nga Nobyembre 2018.
Daytoy ti inbatad ni Engr. Nestor Passion, iti 1st Engineering District ti DPWH.
Kuna na nga adda pay ti tallo nga span ti saan a naaramid.
Segun kenni Passion, kasangsangpet ti landok a maikapet iti nasao a proyekto.
Inbatad na a no makapagflooring dagiti tao ti kontraktor intono maudi a lawas ti Mayo ket posible a malukatan ti baro a kalsada iti maikatlo a lawas ti Hunyo.
Mainaig iti daytoy, inpakaammo ni Passion a mabalbaliwan to pay ti disenyo dagiti intersection ti bypass road gapu ta adu ti nakaobserbar a narisgu daytoy.
Naamuan a no malpas ti baro bypass road manipud ti Airport road agpatingga iti ili a Bacarra ket dakkel a makatulong iti panaglukay ti trapiko ti Gilbert Bridge ditoy siudad ti Laoag.
