LAOAG CITY – Nagun-od ti Ilocos Norte ti maikanem a “Best Tourism-Oriented Local Government Unit” babaen iti maikadua a runner-up finish-na iti Association of Tourism Officers of the Philippines ken Department of Tourism’s (ATOP-DOT) Pearl Awards for Best Tourism Practices 2024 idiay Koronadal City.
Basar iti Provincial Tourism Office, nagun-od ti probinsia ti top award idi 2023 ken 2018 ken addaan itan ti uppat a runner-up finishes iti nadakamat a kategoria manipud 2016.
Ti ATOP-DOT Pearl Awards ket mangbigbig kadagiti pioneering projects dagiti local government units nga agturong iti panagdur-as ti industria ti turismo ti pagilian kas paset ti Association of Tourism Officers of the Philippines 25th National Convention.
Nabigbig ti Ilocos Norte gapu iti naiget a panangitandudona a mangpadur-as iti turismo ken panangallukoy kadagiti lokal ken internasional a bisita.
Naammoan a malaksid iti kangrunaan a pammadayaw, napili ti Ilocos Norte a grand winner iti kategoria a Best Tourism Promotions-Brochure.
Kabayatanna, dagiti dadduma pay a naisangsangayan nga entries manipud iti probinsia ket pakairamanan ti maikadua a runner-up finishes iti Best Tourism Promotions-Video category para iti “Raise Your Flag,” a nakaitampokan ti beauty queen Catriona Gray ken iti Best Tourism Event-Festival category para iti “Tan-ok ni Ilocano Festival of Festivals.”
