LAOAG CITY – Napili ti probinsia nga Ilocos Norte nga ag-host iti Little League Philippines Series National Championship inton Abril 11 agingga iti 25 ita a tawen 2026.
Segun ken ni Mrs. Helen Rose Domingo, mangidadaulo ti Provincial Sports and Development Office, daytoy ti umuna a gundaway nga ag-host ti probinsia ti national championship iti nasao nga aktibidad.
Inbatadna nga immun-unan a nag-host ti probinsia iti regional championship nga isu ti nakakitaanda a napintas ti nagresultaanna ken nakitada a napintas dagiti pasilidad ti probinsia isu a napili nga ag-host.
Inlawlawagna a ti nasao nga aktibidad ket dagiti agtawen ti 17 ken agpababa ti makipaset ti baseball ken softball nga isu ti nakadiskubreanda ti maysa nga atleta ditoy probinsia a ni Jerick Flores a nakipagpartisipar pay iti international competition idiay Japan.
Gapu iti daytoy, mangnamnama ni Domingo a babaen iti daytoy ket adu pay ti madiskubre ti governing body iti softball ken baseball nga atleta ditoy probinsia.
