LAOAG CITY – Saan a natuloy ti inagurasion ken turnover ti Rice Processing System iti ili ti Piddig ditoy Ilocos Norte nga idauluan kuma ni Pang. Ferdinand “Bongbong” Marcos Jr. gapu iti kellaat a napigsa a tudo.
Gapu iti napigsa nga angin, natulid dagiti naibangon a tolda, rason ti pannakaitantan ti programa karaman ti pannakaiwaras dagiti nagduduma a makinaria ti agrikultura.
Nagbakwit dagiti tattao ken dadduma nga opisiales a pakairamanan da Gov. Matthew Marcos Manotoc ken ni Bise Gov. Cecilia Araneta Marcos.
Agingga ita ket awan pay ti inruar ti Presidential Communications Office no kaano nga agtuloy ti nadakamat a programa.
Kabayatanna, inton bigat ket idauluan ni Pang. Marcos ti programa para iti Sulvec Small Reservoir Irrigation Project iti ili ti Pasuquin.
