LAOAG CITY – Mangirubuat ti Ilocos Norte Electric Cooperative wenno INEC ti maysa a programa mainaig iti agrikultura.
Segun ken ni Mr. Cipriano Perry Martinez, General Manager ti Ilocos Norte Electric Cooperative, daytoy ket maysa a wagas tapno matulungan dagiti mannalon iti baet ti mapaspasaran a krisis ditoy pagilian.
Inbatadna a kalikagumda a tulungan dagiti mannalon babaen ti pa-kuriente imbes nga agusar ti diesel pump dagiti zanjera para iti pagpadanum dagitoy iti kataltalonanda.
Inlawlawagna a manarimaan ti pannakaiyurnos ti Implementing Rules and Regulation sakbay a naan-anay a maipatungpal daytoy a programa.
Kunana a malaksid kadagiti zanjera ket kitkitaenda pay dagiti factory ken planta a mabalin a matulungan nga imbes a diesel ti usarenda ket aramidenda daytoy a kuriente.
Innayonna a makikoordinar ti Ilocos Norte Electric Cooperative kadagiti Local Government Units maipanggep iti daytoy a programa.
