LAOAG CITY – Nakaawat ti Ilocos Norte Electric Cooperative wenno INEC babaen ti panangidaulo ni Mr. Cipriano Perry Martinez, Acting General Manager ti Letter of Authority manipud iti Bureau of Internal Revenue.
Daytoy a surat ket tapno maikkan ti gundaway dagiti Bureau of Internal Revenue Examiners a mangkita kadagiti book of accounts ken accounting record para iti amin nga internal revenue taxes ti Ilocos Norte Electric Cooperative manipud idi Enero 1, 2023 agingga iti Disiembre 31, 2023.
Inlawlawag ti kooperatiba a daytoy a surat ket sabali pay iti immune-una a surat nga inted ti Bureau of Internal Revenue mainaig iti panagmulta ti Ilocos Norte Electric Cooperative ti dua a milyon a pisos gapu iti saan a pannakairehistro ti computerized accounting system wenno ti ramit nga us-usarenda iti panagbasa ti metro.
Mainaig iti daytoy, inpasigurado ni Martinez ti pannakitinnulong ken pannakikooperarna iti nasao nga ahensia iti baro a naduktalanda iti financial record.
Inpanamnamana a maisubli ti financial integrity ti Ilocos Norte Electric Cooperative babaen ti panangannongda ti responsibilidadda iti panagbayad ti buis.
Kabayatana, inpakaammo ti Acting General Manager nga adda ti pammilin ti National Electrification Administration wenno NEA a mangisayangkatda ti bukudda nga imbestigasion iti posible a civil ken criminal case kadagiti agdama ken dati a personnel ti Ilocos Norte Electric Cooperative seknan iti nakairamramananda iti Bureau of Internal Revenue.
