LAOAG CITY – Kiniddaw manen ti legal a kampo ni dati a Presidente Rodrigo Duterte ti interim release daytoy kalpasan a naawanan ti puot ti namindua a daras iti uneg ti detention-na idiay The Hague, Netherlands.
Segun iti abugadona a ni Nicholas Kaufman, makapaspasar ti dati a Presidente ti nakaro a short-term memory loss nupay nagtalinaed ti long-term memory daytoy.
Nangipasa ti baro a medical report ti kampo ni Duterte tapno suportaran ti kiddawna a temporario a pannakawaya-wayana.
Daytoy ket kalpasan nga inbasura ti korte dagiti immunan nga ebidensia mainaig iti kumapkapsot a pisikal ken mental a kapasidad ti dati a Presidente.
Inbatad ni Kaufman a marigrigatanen ti dati a Presidente a mangipaay ti naurnos a pammilin kadagiti abugadona.
Naiparuk-at daytoy a damag kagiddan ti pormal a panangrugi ti panagdengngeg ti International Criminal Court (ICC) tapno kitaen no maipadalan iti panangtingiting ni Duterte para iti kaso a crimes against humanity nga adda ti pakainaiganna iti kampaniana kontra iti ilegal a droga wenno war on drugs.
