LAOAG CITY – Inrakurak ni United States President Donald Trump a posible a kaaduan kadagiti nabatbati nga hostage idiay Gaza ti posible a natayen dagitoy.
Inbatad ni Trump iti Oval Office-na, mabalin a sumagmamano kadagiti hostage ket pimmusayen idi laeng kallabes kas maibasar iti naammoanna.
Inlawlawagna nga agarup 38 nga hostage ti pagam-amkan a natayen a kaaduan kadagitoy ket dagiti ubbing pay laeng.
Iti baet daytoy, agtultuloy ti naun-uneg a pannakikoordinar ti Amerika iti Hamas.
Naammoan a binallaagaan ni Trump ti Hamas a waya-wayaanen dagiti amin nga hostage-da ken no saanda nga agtungpal ket adda ti nadagsen a situasion a mapasamak kadakuada.
Inaramid ni Trump ti rakurak iti baet ti plano a baro nga opensiba ti Israel idiay Gaza City.
Iti agdama, nagtalinaed pay laeng idiay Gaza ti 47 nga hostage manipud iti 251 nga hostages ti Hamas sipod rinaut ti grupo ti Israel idi Oktubre 7, 2023.
Nupay kasta, basar iti Israeli military, addan ti 25 ti natayen kadagiti nabatbati nga hostage ken maikagkagumaan ti pannakaiyawid dagiti bangkay dagitoy.
