LAOAG CITY – Nakasagana ti legal team ni Vice President Sara Duterte a sumurot iti pammilin ti Korte Suprema nga agkomento iti apela ti Kamara de Representantes.
Inbatad ni Atty. Michael Poa, maysa kadagiti abugado ni Vice President Sara nga agisubmitirda ti komento iti uneg ti naikeddeng a panawen.
Immunan a nangipila ti Kamara iti babaen ti Office of the Solicitor General ti mosyon idi Lunes, Agosto 4 tapno kiddawen a baliktaden ti Korte Suprema ti immuna a desision daytoy a nangideklarar iti maikapat nga impeachment complaint kontra iti Bise Presidente kas unconstitutional wenno maikanniwas iti paglintegan.
Ginutigot ti Kamara ti Korte Suprema a palubusan isuda nga aramiden ti responsibilidadda a nakailanad iti Konstitusion nga ag-impeach ken mangiwayat ti panangtingiting.
Inbilin ti Korte Suprema ni Vice President Sara ken ti abugadona a ni Atty. Israelito Torreon nga agisubmitir ti komentoda iti uneg ti saan a lumabes iti sangapulo nga aldaw.
