LAOAG CITY – Inbatad ni Barangay Chairman Oliver Valite iti Barangay Naglicuan iti ili ti Pasuquin nga awan ti travel history ti nagpositibo ti covid-19 iti barangay da a ni IN-C2749, agtawen ti 72 a lalaki.
Inlawlawag ni Valite a masaksakit ti pasyente ken rumuar laeng iti balay da no mapan agpa-dialysis iti Black Nazarene iti ili ti San Nicolas isut gapuna a masdaaw no kasanu a naala ni IN-C2749 ti virus.
Inbaga na a kas protocol no mapan agpa-dialysis ket dimmalan ti pasyente iti antigen test ket positibo ti resulta na.
Gapu iti daytoy, inpan da ti pasyente iti Mariano Marcos Memorial Hospital and Medical Center iti ciudad ti Batac ken dimmalan iti swab test no sadinno a positibo met ti resulta na.
Kuna ti kapitan a mamindua a daras a mapan agpa-dialysis ti pasyente iti kada lawas.
Inpakaammo ni Valite a ti laeng nakapulapol ti pasyente ket ti asawa na a kakaisuna a kabbalay na ken ti anak da a mapan mangsuksukon kenkuana no mapan ag-dialysis.
Innayon na a dimmalan ti swab test ti asawa ken anak ti pasyente idi kalman ken mangnamnama a negatibo ti resulta na.
Immun-una iti daytoy, kuna ni Valite a sakbay a napan nagdialysis ti pasyente ket narikna na a nadagsen ti bagina isut gapuna nga inbaga na a mapan agpacheckup iti ospital.
Inpakaammo ni Valite a saanda nga ilockdown ti barangay da partikular iti sitio nga ayan ti pasyente gapu ta awan ti sabali a nakapulapol na malaksid iti asawa ken anak na.
