LAOAG CITY – Inbasura ti piskalya ti kaso a libel nga inpila ni Police Major Ryan Retotar kontra kadagiti uppat a personalidad a pakairamanan ti dua nga empleado iti Bombo Radyo Laoag.
Dagitoy ket isuda Station Manager Randy Yute ken ti reporter a ni Bombo Jude Pitpitan.
Ni Major Retotar ket agdama nga Acting Chief of the Provincial Plans and Program Unit iti Ilocos Norte Police Provincial Office (INPPO).
Immuna a nagpila ti kaso ti maysa kadagiti respondent a ni Police Staff Sergeant Jonel Mangapit kontra ken ni Retotar nga ak-akusaran na nga extortionist.
Saan a nagpila ti counter affidavit ni Retotar imbes ket nagpila ti libel kontra ken ni Mangapit ngem inbasura ti piskalya.
Gapu iti daytoy, nagpila manen ni Retotar ti libel no sadinno a malaksid ken ni Mangapit ken inraman na payen a pinilaan da Bombo Jude ken Bombo Randy, pakairamanan ni Retired Police Officer Marvin Pascua.
Daytoy ket gapu ta ak-akusaran ni Retotar ni Pascua nga isuna ti immay nangted ti kopya ti counter affidavit ni Mangapit ditoy Bombo Radyo Laoag.
Inraman ni Retotar a kinasoan dagiti dua nga empleado ti Bombo Radyo Laoag gapu iti akusasyon na a maipagarop a saan nga innala dagiti maseknan ti kabibiangan na mainaig iti immunan a kaso a naipila kontra kenkuana iti baet a naipatpatangatang ti nasao nga isyu.
Nupay kasta, iti pannakaadal ti kaso ket inbasura ni Associate City Prosecutor Maricet Buena Galiza-Conception gapu ta nakurang daytoy ti probable cause.
