LAOAG CITY – Kinumpirmaran ti Department of Justice a pormalen nga inpilada iti korte ti kaso kontra iti kontratista a ni Sarah Discaya nga adda ti pakainaiganna iti panagbayad ti buis.
Inbatad ni Justice Spokesperson Atty. Polo Martinez, maiyataday daytoy idi naduktalan ti prosekusion nga adda ti umdas a pangibasaran tapno ipila kas kaso ti reklamo a sangsangoen ni Discaya.
Kunana a nakita ti panel of prosecutors ti kaadda ti ‘prima facie evidence with certainty of conviction’ isut gapuna nga inyulin iti korte ti kaso.
Partikular a pinilaanda ti uppat a bilang ti kaso a ‘tax evasion’ ti kontratista a namunganay iti pannakapaay ti panangipatungpal a bayadan ti husto ti maiyannatop a buis iti taxable year 2020 ken 2021.
Inlawlawag ti nasao a pannakangiwat no apay a four counts tax evasion case ti inpila ket gapu iti kada taxable year a nadakamat ket nakitaan daytoy ti panaglabsing iti Sections 254 ken 255 ti National Internal Revenue Code ti pagilian.
Iti babaen daytoy a linteg, ti inaramidna a nairanta a libasan ti umiso a panagbayad ti buis ken ti pannakapaay ti panangipaay ti pudno nga impormasion maipanggep iti bayadan.
Pormal a naipila dagiti nasao a kaso iti Court of Tax Appeals idi Pebrero 3 iti agdama a tawen.
Malaksid ken ni Sarah Discaya, sumangsango met iti kapada a kaso ti asawana a ni Pacifico ‘Curlee’ Discaya.
Nupay kasta, inadmitir ti Department of Justice no idasig ti babai a Discaya, intantan pay laeng a kasoan iti korte ni Curlee Discaya.
Kuna ni Justice Spokesperson Martinez, nangipila ti mosion ti kampo ni Discaya a nangitunda tapno saan pay laeng a maituloy ti panangipila ti kaso.
Ikonkonsiderar daytoy ti panangipila ti impormasion wenno resolusion ti prosekusion isu a kiniddawna ti Bureau of Internal Revenue nga agisubmitir ti komentoda.
Iyuray ti prosekusion ti ipasa a komento ti ahensia kabayatan nga agtultuloy ti preliminary investigation sakbay a pormal a resolbaren ti reklamo ken ipila kas maysa a kaso.
