LAOAG CITY – Kiniddaw ti partido ti respondent a ni Mayor Hon. Alfredo P. Valdez Jr. iti ili ti San Nicolas iti Sangguniang Panlalawigan a madismiss ti naipila a kaso administratibo kontra kenkuana babaen kadagiti complainants nga isuda Engr. Ernesto Pagaling ken Damaso Tolentino Jr.
Inlawlawag ni Bokal Da Vinci Crisostomo, Chairman ti Committee on Laws a saan nga umanamong ti nasao a partido a mapatawan ti preventive suspension ti respondent.
Nupay kasta, mamati ti partido dagiti complainants a saan a madismiss ti kaso administratibo gapu ta napigsa dagiti ebidensya kontra kenni Mayor Valdez a maipagarop a panagabuso na iti turay.
Kunana a no napigsa ti ebidensya ket maiyaplikar ti preventive suspension kabayatan ti pannakadengngeg ti kaso.
Innayonna a naikkan ti gundaway nga agisubmitir dagiti dua a partido ti position paper para iti dua nga isyu a motion to dismiss ken preventive suspension.
Kalpasan a makaisumitir ti dua a partido ket adalen ti junta probinsyal ti nasao nga isyu ken matingiting no madismiss wenno saan ti nasao a kaso.
Manamnama a maituloy ti sumaruno nga hearing session intono Hunyo.
Maipalagip a namunganay ti nasao a kaso gapu iti operasyon ti galyera iti ili ti San Nicolas.
