LAOAG CITY – Ngimmato ti koleksion iti parking fee ti Laoag City Public Market and Commercial Complex.
Segun ken ni Mayor James Bryan Alcid, ngimmato daytoy idi Disiembre 2025 no idasig kadagiti napalpalabas a tawen ken kalikagumna nga agtultuloy daytoy.
Inbatadna nga inikkanna pay dagitoy ti target a 20% collection a panagngato daytoy ita a tawen.
Kunana a kabayatan iti panagturongna iti tiendaan tapno kitaen iti situasion ditoy ket nakitana ti nagdur-asan iti nasao a merkado publiko.
Inpasingkedna a naplastar dagiti aglako manipud iti baba agingga iti ngato ti tiendaan no sadinno a nakitana iti kinadalus iti basement isut gapuna a maragsakan unay daytoy.
Innayon ni Mayor Alcid ti ad-adda pay a pannakapasayaat ti Laoag City Public Market and Commercial Complex.
Maipalagip a maysa kadagiti kalikagum ti Mayor iti pannakaurnos ken pannakaplastar ti tiendaan tapno nadaldalus ken nataltalged met laeng a pagturongan dagiti umili.
