LAOAG CITY – Inlawlawag ni Konsehal Jason Perera ditoy ciudad ti Laoag nga adda ti tallo a wagas no kasanu a mapasamak ti hoarding.
Kuna na a ti mabalin a makaaramid iti dua a wagas ket ti mismo nga agtagikua ti gas station ken dagiti traders idinto a ti maikatlo a wagas ket uray siasinno nga indibidual.
Inlawlawag ni Perera a maibasar iti inparuk-at a pagannurutan ti Department of Energy, makita no ania ken mano ti pagkasapulan ti maysa a tao iti gasolina.
Inyarig ni Perera ti maysa nga ospital a kasapulan latta nga adda ti ginasut a litro ti gasolina a reserba na tapno adda ti dagus nga usaren da partikular ti generator no agpukaw ti kuryente.
Innayon na nga uray dagiti mannalon ket nakadepende no kasanu ti kalawa ti taltalonen da ti pagkasapulan da ti gasolina a rebbeng a mailako kadakuada.
