LAOAG CITY – Inpasingked ni Konsehal Jason Perera nga ireport na ti City Engineering Office iti Ombudsman no mapaay nga agsungbat wenno mangipaay ti dokumento mainaig kadagiti silaw ditoy ciudad ti Laoag
Inaramid daytoy ni Perera kabayatan ti regular session kalpasan a nagtalinaed nga awan ti sungbat ti City Engineering Office mainaig iti nasao nga isyu.
Immuna iti daytoy, inriing ni Konsehal Perera iti konseho ti nasapa a pannakaiddep ti silaw dagiti sumagmamano a solar street lights ditoy ciudad ti Laoag, kangrunaan na iti nagbaetan ti Ablan Avenue ken Panganiban street.
Segun ken ni Perera, naobserbar na daytoy iti idadalan na iti lugar iti oras ti alas-diyes ti rabii.
Inbatad na nga immunan a naidasar daytoy a banag, addan pito a bolan ti napalabas ngem agpapan ita ket awan pay ti nagbalin nga addang ti City Engineering Office.
Kunana a kasapolan a mangted ti City Engineering Office iti kopya iti kontrata tapno makita no dagitoy ket adda paylaeng iti warranty-na.
