LAOAG CITY – Nasugatan ti maysa a lakay kalpasan a tinagtagbat ti kaanakan na iti Barangay Salanap iti ili ti Pinili.
Segun ken ni Police Senior Master Sergeant (PSMS) Noel Gamit, Chief Investigator ti PNP Pinili, nagsagaba ti biktima, agtawen ti 71, ti sugat iti ulo ken tengnged na.
Inbaga ni Gamit a basar iti panagimbestigar da, kabayatan nga agutugaw ti biktima ken as-asikaswen ti anak na a babai gapu ta na-stroke daytoy ket dimteng ti suspek.
Immuna a ginandat ti suspek a tagbaten ti anak ti biktima ngem nadepensaan na ti bagina.
Gapu iti daytoy, insublat ti suspek a tinagbat ti lakay a nakatamaan ti ulo ken tengnged na idinto a gasgas laeng iti akin-kannawan a saka na ti sinagaba ti anak nasao a biktima.
Naitaray dagiti agama iti Mariano Marcos Memorial Hospital and Medical Center iti ciudad ti Batac para iti naan-anay a pannakataming da kangrunaan na ti nasao nga ama.
Inbaga ni Gamit a riri iti daga ti kitkitaen da a motibo iti napasamak ken nakainom ti suspek idi aramiden na ti krimen.
Gapu iti daytoy, pilaan da ti Frustrated murder ken slight physical injury ti nasao a suspek.
Inpakaammo ni Gamit nga inpakustodyar da pay laeng ti suspek iti PNP-Currimao gapu ta manarimaan a matartarimaan ti kwerpo ti pulisya iti ili ti Pinili.
Kabayatanna, naibaga pay ni Gamit nga adda ti naminsan a rinespondean da ti suspek gapu ta nabartek ken nangriribok iti lugar da.
