LAOAG CITY – Maysa a lalaki idiay Idaho, U.S.A. ti nakairekord ti world record kalpasan a napagpuligosna iti imana ti umap-apoy nga espada.
Kinumpirmaran ti records keeping organization a Guinness World Records a ti serial record breaker a ni David Rush ti baro a record holder ti titulo a “Most Throws and Catches of a Fire Sword.”
Daytoy ket kalpasan a kabaelanna nga ipurwak ken masarapa ti 73 a daras ti maysa nga agliklikos nga umap-apoy nga espada iti uneg ti 30 a minuto.
Saan a nagbalin nga alisto ti record attempt ni Rush gapu ta ti immuna a gandatna ket natnag manipod iti imana ti espada isu a kinasapulanna nga uliten manen manipod iti rugina.
Iti maikadua a gandatna, nauram ti buokna ken kudil iti takiag ngem intultuloyna latta ti panangipurwak ken panangsarapa.
Iti maika-73 a daras a panangsarapana, insardengen ni Rush gapu ta naartapannan ti previous record nga 60.
Ni David Rush ket nabirngasan kas “serial record breaker” gapu ta kalikagumna nga agbalin a ‘”Most Concurrent Guinness World Record Title Holder.”
Iti agdama, addaan daytoy ti 166 Guinness Records ken dandaninan a maartapan ni Silvio Sabba nga addaan ti 180 Records.
