LAOAG CITY – Naarestar ti maysa a lalaki iti Anti-illegal Drug Buy-bust Operation iti Barangay Araniw ditoy siudad ti Laoag.
Nabigbig ti suspek a ni Alexander Guarino, agtawen ti 58 ken residente iti nasao a barangay.
Inbatad ni Guarino a pinastrekna iti uneg ti pagtaenganda ti maysa a lalaki a nagpammarang kas police poseur buyer gapu ta ammona nga asset daytoy ti Philippine National Police.
Nupay kasta, kunana a nakigtot lattan nga adda dagiti dadduma pay a pulis a simrek iti pagtaenganda.
Inadmitirna nga agus-usar daytoy ti iligal a droga ngem naiget a naglikudanna nga aglaklako daytoy ti iligal a droga.
Innayon ti suspek a saan daytoy a miembro iti aniaman a drug group ditoy probinsia.
Mainaig iti daytoy, inpakaammo ni P/Capt. Kester Arellano, Deputy Chief of Police ti Laoag City Police Station a maibilang ti suspek kas maysa nga High Value Individual ken karaman iti drug group nga agop-operar ditoy probinsia.
Kunana nga apaman a rimmuar iti pagbaludan ti suspek ket naigetda nga inmonitor no sadinno a maipagarup a nagtultuloy daytoy a nagusar ken naglako ti iligal a droga.
Kabayatanna, naammoan nga agdagsen ti 4.9 grams ti nakumpiskar a droga nga agbalor ti 33,320 a pisos.
