LAOAG CITY – Pimmusay bayat a maag-agasan ti maysa a panadero kalpasan ti napasamak a desgrasya iti paset ti Barangay 46, Nalbo ditoy ciudad ti Laoag.
Nabigbig ti biktima a ni Renato Lusterio y Rafa, agtawen ti 50, naasawaan ken residente iti nasao a barangay idinto a ti nakadungpar ket ni Kevin Mchay Labucay, agtawen ti 31, awanan ti asawa, load collector ken residente iti Brgy. Nagbacalan iti ili ti Paoay.
Iti imbestigasyon ti PNP-Laoag Traffic Division, bayat amagmagna nga agpaamyanan ni Lusterio kadwa na ti asawa na Emily Lusterio a naggapo iti abagatan a paset ti kalsada ket nadungpar ni Labucay a naggapo met iti daya ken agpalaud a direksyon.
Gapo iti daytoy, nagsagaba ni Lusterio ti sugat iti nagduduma a paset ti bagi na kangrunaan ti ulo na ken naitaray iti Laoag City General Hospital (LCGH) ngem naidekla a pimmusay bayat ti pannakataming na idinto a ni Labucay ket nasugsugatan ken naityaray iti Gov. Roque Ablan Senior Memorial Hospital ditoy ciudad.
