LAOAG CITY – Nasugatan ti maysa a lalaki kalpasan a tinagbat ti mismo a kasinsin na iti Barangay 50, Buttong ditoy ciudad ti Laoag.
Segun kenni Pol. Lt. Col. Rafael Lero, chief of police ti PNP-Laoag, ti biktima ket isu ti helper iti pagkaseraan idinto a ti suspek ket agtrabtrabaho kas delivery boy ti karkarne, ken agnanaed da iti nasao a boarding house a kukua met laeng ti uliteg da.
Iti inisyal nga imbestigasyon, kuna ni Lero nga umis-isbo ti biktima iti asideg ti garahe ti pagkaseraan idi kellaat a pinang-or ti suspek ti muging ti kasinsin na usar ti pagiggaman ti buneng.
Inbatad a kalpasan daytoy ket ginandat a tagbaten ti suspek ti biktima ngem nasangga na ti buneng isut gapo na a ti nasugatan ket ti akin-kannigid a dakulap na.
Dagus met a naitaray iti Gov. Roque Ablan Senior Memorial Hospital ditoy ciudad ti Laoag ti biktima ken iti panagresponde dagiti otoridad ket natiliw met laeng ti suspek.
Agpapan maisursurat ti damag ket saan da pay a maduktalan ti motibo ti suspek gapo ta saan met nga agsusurot ti palawag ti suspek.
Kunana a kabayatan ti pasamak ket naamoan da a nabartek ti suspek.
Kabayatanna, basar iti palawag ti biktima ket saan na nga ammo no anya ti rason ti suspek no apay a dinangran na isuna.
Desidido met ti biktima a mangipila ti reklamo kontra iti nadakamat a suspek.
