LAOAG CITY – Nakikoordinar ti Laoag City Tourism Office iti Department of Tourism para iti pannakaiyuswat ti training ken seminar maipanggep iti tour-guiding.
Daytoy ti inpakaammo ni Ms. Angel Lao, mangidadaulo iti nasao a pangopisinaan.
Segun kenkuana, ti kangruaan a gagemda ket tapno ad-adda a maaddaan ti napinpintas a kapadasan dagiti turista ken gangganaet kabayatan ti kaaddada ditoy probinsia.
Inbatadna a babaen iti daytoy ket magutigot dagiti bisita nga agtalinaedda iti napapaut ngem iti aldaw a naituding a panagsublida iti naggapoanda a lugar.
Inlawlawagna a kalikagum ti City Tourism Office a naiget a maitandudo dagiti maipagpannakkel a tourist spot ditoy siudad kas ti Watch Tower iti Brgy. Gabu, Tobacco Monopoly a masarakan iti Aurora Park ken Laoag Sand Dunes.
Kunana a dakkel a tulong ti pannakaiyuswat ti nasao nga aktibidad tapno maipaadal kadagiti maseknan ti rumbeng a wagas a pamay-anda iti panangallukoy kadagiti turista.
Maipalagip a gagem ti City Tourism Office nga ad-adda pay a pasayaaten ken papintasen ti Tourism Center nga isu ti kangrunaan a pagtarusan dagiti agturong a turista.
