LAOAG CITY – Inlawlawag ni Vice Mayor Rey Carlos Fariñas nga aggudua nga agbayad ti Local Government Unit ditoy siudad ti Laoag ken ti SM para iti libre a panagbuya dagiti senior citizens ken Person’s With Disability.
Segun kenkuana, agarup 560 a ribu ti mabalin a gastosen ti dakkel a mall iti kada bulan no isuda laeng ti agbayad iti daytoy.
Inbatadna a naipakaammo met daytoyen a banag ken ni Mayor Michael Marcos Keon tapno makabiruk ti pundo a mausar para iti pannakaipatungpal daytoy.
Inlawlawagna nga ikagkagumaan ti lokal a gobierno tapno mangrugin a makabuya dagiti senior citizen ken adda ti rangkap ti bagina iti pagsinean.
Kunana a masapul met nga urayen dagiti senior citizen ken adda ti rangkap ti bagina ti “go signal” para iti panagbuya dagitoy ti libre a sine iti dakkel a mall.
Immuna iti daytoy, inaprobaran ti konseho ti ordinansa para iti pannakalibre ti panagbuya ti sine dagiti senior citizen ken adda ti rangkap ti bagina ditoy siudad ti Laoag.
