LAOAG CITY – Inpakaammo ni Ms. Ryan Rollaine Simon, mangidadaulo ti Municipal Disaster Risk Reduction and Management Office a naiget a maipatpatungpal ti liquor ban iti ili ti San Nicolas kabayatan iti iduduprak ti Bagyo Emong.
Segun kenkuana, daytoy ket kas maiyataday iti naipasa nga ordinansa iti ilida a naiget a maipawil ti panaginum panaggatang wenno panaglako ti arak kabayatan a nga adda ti mapaspasaran a bagyo.
Malaksid iti daytoy, kunana a naiget pay a maipatpatungpal ti pre-emptive wenno force evacuation no kasapulan kas maibasar iti ordinansa iti ilida.
Inbatadna nga adda ti uppat a pamilia a naibakwit manipud iti Barangay 3 ken Barangay 16 iti ili ti San Nicolas a dagitoy dagiti masansan malaylayos tunggal adda ti dumuprak a bagyo.
Inlawlawagna a naiget ti panangmonitorda kadagiti lugar a kanayon a malayos tapno insigida dagitoy a maibakwit.
Innayonna nga adda ti naisayangkat a taripnong kaduada dagiti amin a kapitan iti ili ti San Nicolas tapno maipakaammo kadagitoy dagiti nasken nga aramiden ita a panawen ti kalamidad.
