LAOAG CITY – Nagballaag ti LPG Marketers Association kontra kadagiti retailer nga aglaklako ti 11-kilo ti LPG tank a maipagarop a nalabes unay manipod iti usto a presyo wenno nasursurok a P1,500 ti presyo iti Luzon ken nasurok a P1,600 iti Visayas ken Mindanao mangrugi ita a bolan ti Abril.
Segun ken ni Arnel Ty, founder ti nasao nga asosasyon, ti agdama a suggested retail price (SRP) ket agay-ayam iti P1,350 agingga iti P1,400 ti kada tanke.
Gapu iti panagngato ti shipping costs a gubuay ti limitado nga access iti Strait of Hormuz, namnamaen a ngumato ti suggested retail price iti Luzon manipod P1,450 agingga iti P1,500 iti sumaruno a lawas, idinto a ti Visayas ken Mindanao ket mabalin a manayunan ti P100 agingga iti P250 iti kada tanke.
Basar iti grupo, ti aniaman a tangke ti LPG nga umab-abot iti P1,600 ket maibilang nga overpriced ke mabalin ng agreklamo iti barangay ken iti nailian a pulisya gapu ta daytoy ti naipalaon iti memorandum of agreement iti nagbaetan ti Department of Energy (DOE) ken Philippine National Police (PNP).
Binalakadan met ti grupo ti gobierno a saan a mangipatungpal ti price cap iti LPG, gapu ta mabalin a mangitunda daytoy ti panagkurang ti suplay, kas iti napasamak idiay India ken Vietnam nga agpilpila tapno makagatang ti LPG gapu ta mapilpilitan dagiti private sector a saanen nga ag-import.
