LAOAG CITY – Nagballaag ti Land Transportation Franchising and Regulatory Board (LTFRB) kadagiti drivers ken operators ti Public Utility Vehicles (PUVs) nga agsingsingir ti doble a plete dagiti pasahero basar ti kadakkel ti bagida.
Inaramid daytoy ti ahensya kalpasan a nakaawat da ti naruay a report mainaig iti maipagarop a pannakasingsingir ti doble a plete dagiti pasahero nga “overweight” wenno plus-size.
Kinondenar daytoy ni Land Transportation Franchising and Regulatory Board Chairperson Teofilo Guadiz III, ken inpetteng na nga awan ti lugar iti transport system ti diskriminasyon.
Inpetteng ni Guadiz a ti sobra a panagsingir ti plete aniaman ti kinatao wenno kadakkel ti bagi ti maysa a pasahero ket saan a nainkalintegan.
Inpalgak na a siasinno man a driver wenno operator kadagiti pampubliko a transportasyon a maduktalan a guilty iti nasao nga akusasyon ket sumango ti maiyannatop a pannusa.
