LAOAG CITY – Suportado ti Malacañang ti pannakaipatungpal ti nalawa a konsultasyon mainaig iti inlungalong ti Department of Education (DepEd) nga ipatungpal ti trimester system manipod Kindergarten agingga iti Grade 12.
Inbatad ni Presidential Communications Office Undersecretary ken Palace Press Officer Claire Castro a napateg a mapagsasaritaan a naimbag ti amin nga stakeholders ken dagiti interesado a sektor tapno maestablisar ti kapintasan ken kasayaatan a programa para kadagiti agad-adal.
Inlawlawag ni Castro a nagtalinaed a lungalong paylaeng ti panagbalbaliw ken agdama nga idasdasar ti Department of Education dagiti possible a benepisyo daytoy.
Kuna pay ni Castro a kasapulan pay ti naiget a pannakaadal ti programa sakbay ti naan-anay a pannakaipatungpal na.
Basar iti panagadal ti Second Congressional Commission on Education (EDCOM II), inbatad ni Education Secretary Sonny Angara a makatulong ti trimester system iti panangipaay ti at-atiddog ken ad-adda a flexible a panawen ti panagisuro, pannakapalag-an ti workload dagiti mangisursuro ken pannakaipangato ti kalidad ti edukasyon.
Iti babaen ti gakat, magudua iti tallo nga academic term ti school year tapno maaddaan ti at-atiddog ken agtultuloy a panagisuro len naur-urnus a pacing dagiti lessons.
