LAOAG CITY – Inpaima ti Malakanyang iti International Criminal Court (ICC) ti panangiyisyu ti hold departure order kontra kadagiti co-conspirators iti war on drugs ni dati a Pres. Rodrigo Duterte.
Daytoy ti inrakurak ni Palace Press Officer Atty. Claire Castro iti baet ti posibilidad a rummuar ditoy pagilian dagitoy tapno aglemmeng.
Inbatadna a saan a sakupen ti gobierno ti kaso ti walo nga indibidual iti International Criminal Court isut gapuna a saan a maisyuan dagitoy ti hold departure order.
Inlawlawagna a ti aramiden laeng ti gobierno ket makitinnulong iti Interpol ken saan a kasapulan a mangiyisyu ti hold departure order gapu ta awan ti kaso dagitoy ditoy Pilipinas.
Iti agdama, awan pay ti warrant of arrest kontra iti walo a co-conspirators wenno maipagarup a kakunsabo no sadinno a karaman kadagiti nainaganan ket isuda Sen. Bato dela Rosa, Sen. Bong Go, dati a Justice Secretary Vitaliano Aguirre ken uppat a dadduma pay a dati nga opisial ti Philippine National Police.
