LAOAG CITY – Kinontra ti Malacañang ti nagbalin a rakurak ni Vice President Sara Duterte a saanen a makisarsarita iti sumagmamano a senador a mangsupsuporta kenkuana gapu ta maipagarop a pannakahar-harass da babaen ti administrasyon.
Inpetteng ni Palace Press Officer Undersecretary Atty. Claire Castro a sabali manen naar-aramid ken inuulbud nga istorya ti rakurak ti bise presidente.
Inpalgak ni Castro a saanda nga ammo no paggapgapwan dagiti talent ti bise presidente nga agiwarwaras ti peke a damag.
Innayon ni Castro nga immunan a nagiwaras ti peke a damag ti kampo ti bise presidente maipanggep ti maipagarop a kanen laeng ti baboy ti bagas nga agbalor ti 20 a pisos iti kada kilo nga ibunbunong ti administrasyon babaen kadagiti Kadiwa Stores.
Maipalagip a ti rakurak ti bise presidente ket kalpasan a nasaludsud kenkuana maipanggep ti maipagarop a term-sharing iti liderato ti senado.
