LAOAG CITY – Pimmusayen ti maysa a mangisursuro kalpasan a nadungpar ti nakamotorsiklo a kameng ti Philippine Coastguard kabayatan ti panag-walking na iti by-pass road ditoy ciudad ti Laoag iti kallabes.
Daytoy ti kinumpirmaran ni Police Master Sergeant Eric Bumagat, ti mangidadaulo iti Philippine National Police – Traffic Division ditoy ciudad.
Ti biktima ket agtawen ti 31, mangisursuro, naasawaan ken residente iti Barangay 55-C, Vira ditoy ciudad ti Laoag idinto a ti nangiturong ti motorsiklo ket agtawen ti 36 a lalaki, kameng ti Philippine Coastguard, taga Tubao, La Union ngem agdama nga agnanaed iti Barangay 36, Natba iti ili ti Bacarra.
Iti imbestigasyon, kabayatan ti panag-walking ti biktima iti lugar ket kellaat lattan a nadungpar ti nakamotorsiklo a nagsagabaan na ti nakana a sugat iti nagduduma a paset ti bagina.
Naitaray ti biktima iti ospital ngem pimmusay kabayatan a maag-agasan.
Mainaig iti daytoy, naamoan a ti driver ti motorsiklo ket awan ti lisensya na ken maipagarop a nakainom ti nasanger.
Maisagsaganan ti kaso a maipila kontra iti nasao a suspek.
