LAOAG CITY – Maisagsagana ti kaso a panaglabsing ti Anti Cattle Rustling Law kontra iti maysa a lalaki kalpasan a nagtakaw ti baka iti Brgy. 28 iti ili ti Pasuquin.
Daytoy ket kalpasann a naarestar ti suspek iti Brgy. 4 iti ili a Bacarra babaen iti hot pursuit operation babaen kadagiti kameng ti PNP Pasuquin ken PNP Bacarra.
Nabigbig daytoy a ni Orlando Dalire y Balboa, naasawaan, agtawen ti 40, ken residente iti Brgy. 22, Dilanis iti nasao nga ili.
Basar iti imbestigasyon, nagkamang ni Raffy Carlim y Aranda, agtawen ti 36, awanan asawa, mannalon ken residente iti Brgy. 28 iti nadakamat nga ili iti PNP Pasuquin a mapukpukaw ti nakagalot a puraw a baka na iti barangay da.
Tinakaw ni Dalire iti nadakamat a baka ken ginandat nga nga ilako na ken ni Mendel Sumaoang y Bagain, agtawen ti 37, awanan asawa ken residente iti Brgy. 21, Brgy. Libtong iti ili a Bacarra.
Segun kenni P/Capt. Christian Felix, nagdudua ni Sumaoang idi awan makita na a dokumento ti baka rason a napan na bineripikar kadagiti asideg a barangay no siasino ti agtagikua ti dingwen.
Naamoan nga awan iti taraken a baka ti suspek ken daytoy a baka ti birbiroken ni Carlim.
