LAOAG CITY – Inbatad ni Ms. Arlene De Guzman iti Office of the Mayor ditoy ciudad ti Laoag a maikkan ti konsiderasyon dagiti naglako iti sirok ti rangtay.
Daytoy ket iti baet a ti merkado publiko ditoy ciudad ti Laoag ket temporaryo a naparikepan gapo ta adda ti nagpositibo iti covid-19.
Segun kenni De Guzman, kellaat ti panaglockdown ti nasao a merkado rason a maikkan ti konsiderasyon dagiti aglaklako tapno maipaibus dagiti lako da a kasangsangpet.
Inlawlawag na nga agingga a saan a maswab test dagiti market vendors ket maibirokan dagiti aglaklako ti pwesto a mabalin da a paglakoan.
Innayon na a masapok met a maobserbar ti health protocols kas iti panagisuot ti face mask, face shield ken ti social distancing.
Manamnama nga intono bigat ket dumalan iti swab test dagiti dadduma pay nga aglaklako ken kalpasan daytoy ket saan da a mabalin a rumuar iti pagtaengan da agingga nga awan ti resulta dagitoy.
