LAOAG CITY – Inadmitir ni Barangay Chairman Ruben Sampayan iti Barangay Araniw ditoy ciudad ti Laoag a naalarma da idi naamoan da a positibo ti kameng ti airforce.
Daytoy ket gapo ta ti compound ti airforce iti Laoag International Airport ket sakopen ti barangay da.
Ti nasao nga indibidwal ket maysa nga Authorized Persons Outside Residence (APOR), naggapo idiay Manila ken simmangpet ditoy ciudad ti Laoag idi Hunyo 26 ken naiquarantine iti barracks.
Segun kenni Sampayan, ti baro a kaso ti covid-19 ti probinsya ket kinasapulan nati medical certificate gapo ta mapan da agpa-training idiay ciudad ti Baguio ken ditoy a nagpositibo nga ummuna iti rapid test ken idi kalman ket naamoan da a positibo pay iti swab test na.
Inlawlawag na a ti maysa pay a kameng ti airforce nga adda iti maysa nga unit ti compound ket taga Barangay Araniw ken isu ti maysa a mamonmonitor.
Kunana nga umabot ti 15 nga empleado ti eropuerto nga agnanaed iti barangay da ken no isuna ti kangrunaan a masurot ket ipatungpal na ti lockdown ngem urayen da pay laeng ti mandar kadakuada.
Mainaig iti daytoy, inbatad ni Sampayan a nakasarita na ni Airport Manager Ronald Estavillo ken ditoy nga inpakaammo na kenkuana ti sitwasyon.
Inbatad na nga inbalakad ni Estavillo a mai-isolate da wenno saan da pay laeng a kapulapol dagiti miembro ti pamilya da tapno nataltalged dagitoy.
Kabayatanna, napaigetan ti panagbantay iti Laoag International Airport (LIA) ken saan pay laeng a makastrek dagiti saan nga empleado, pakairamanan dagiti kameng ti media kalpasan ti panagpositibo ti maysa a kameng ti Philippine Airforce ken nakabase iti eropuerto.
