LAOAG CITY – Balligi a natiliw dagiti otoridad ti maysa a lalaki babaen ti naisayangkat nga Anti-Illegal Drug Buy-Bust Operation iti Brgy. 13 ditoy siudad ti Laoag.
Nabigbig ti suspek a ni Samuel Duyao Jr., adda ti umno a tawen, ken residente iti Brgy. Mangato-B ditoy siudad.
Nakumpiskar manipud iti suspek ti walo a small heat sealed transparent plastic sachet a naglaon ti mapapati a shabu, sangaribu a pisos a nausar kas buy-bust money.
Segun iti suspek, iti pasado alas-tres ti malem ti Nobiembre 6 ket adda maysa nga indibidual ti nagturong iti karenderia ti ina na no sadinno nag-order daytoy iti soft-drinks ken sabaw, apaman a napanna in-serve ti order na.
Mainaig iti daytoy, maipagarup nga inyawat ti indibidual ti P1,000 kas bayad ti kanenna idinto a mapan na iyawat ti bayad iti ina na ket kellaat daytoy a ginnamatan ti nasao nga indibidual ken nagayab iti kakaduana.
Innayonna a kabayatan a tinenggel isuna dagiti otoridad ket maipagarup a pinabulsaan isuna iti illegal a droga.
Naammoan a dati a natiliw ti suspek idi tawen 2015 babaen met laeng iti naisayangkat nga Anti-Illegal Drug Buy-Bust Operation ngem nadismissed ti kaso na daytoy gapu ta napaneknekan a ti alegasion kontra kenkuana ket awan ti kinapagpaysuananna.
Kabayatanna, nagtalinaed ti suspek iti kuerpo ti Philippine National Police ditoy siudad ti Laoag.
