LAOAG CITY – Addan iti natalged a kasasaad ti nagbalin a biktima ti napasapamak a pammaltog iti Barangay Sagpatan iti ili ti Dingras.
Binigbig ni Police Captain Joseph Calderon, ti chief of police ti PNP-Dingras ti biktima a ni Sonny Alejo, agtawen ti 22, maysa a mannalon ken residente iti nasao a barangay idinto dagiti suspek ket agtawen ti 29, addaan ti live in partner ken ti kadua na ket agtawen ti 28, naasawaan ken driver ti RHU-Dingras.
Segun kenni Celdron, iti inisyal a panagimbestigar da, manarimaan nga aggi-inom dagiti suspek ken adda dagiti tallo pay a kakadua da pakairamanan ti maysa a tanod idi limmabas ti biktima ket maipagarop a nanggulo iti paggi-inuman dagitoy.
Inlawlawag na a nagboluntaryo ti tanod a mangitulod kenni Alejo iti pagtaengan da ngem idi adda dan iti balay da ket maipagarop a kinariri ti biktima ti tanod ken dinanog na daytoy.
Kalpasan daytoy, nagsubli ti tanod iti paggi-inuman da ken mabalin nga inyistorya na ti napasamak isut gapo na a napan met dagiti dua a suspek iti pagtaengan ti biktima ken ditoy a pinaltogan ti agtawen ti 29 a suspek ni Alejo iti namindua a daras ken idi natulid daytoy ket pinaltogan na pay ti ulo na ngem saan a napakarwan.
Dagus met a naitaray ti biktima iti Gov. Roque Ablan Senior Memorial Hospital ngem naiyakar iti Mariano Marcos Memorial Hospital and Medical Center iti ciudad ti Batac idinto a dagiti suspek ket naglibas.
Nupay kasta, babaen iti inyuswat dagiti otoridad nga hot pursuit operation ket natiliw dagiti suspek no sadinno a ti gunman ket natiliw iti Barangay Dibua South ditoy ciudad ti Laoag a residensya ti libe in partner na.
Kuna ni Calderon nga awan ti narekobre ti SOCO a kapsula iti nakapasamakan ti pammaltog isut gapo na a posible a kalibre 38 a paltog wennoo improvised a paltog ti nausar iti krimen.
Innayon na nga isagsagana da metten ti reklamo a frustrated murder kontra kadagiti suspek bayat nga agtultuloy ti naun-uneg nga imbestigasyon kangrunaan na ti panangrekobre ti paltog a nausar.
