LAOAG CITY – Inlawlawag ti agnagan ti Anna Mejica, iti Barangay 5 iti ili ti Bacarra no kasano a ginandat ti maysa a lalaki ti mang-harass kenkuana bayat a magmagna iti kalsada.
Segun kenni Mejica, napasamak daytoy iti rabii ti Enero 28 bayat a mapan kuma gumatang ken adda ti nagsardeng iti batog na a naka-motorsiklo ken nakasuot ti helmet ken nagdamag no sadinno ti Barangay 6.
Inbatad na a kalpasan a naitudo na ti sapsapulen na a barangay ket agtalya-talyaw pay laeng ngem awan ti makita na a tao.
Gapo iti daytoy, kunana a nagnerbyos ken nagatras ngem iti panaggaraw na iti nagtakderan na ket ditoy met a ginandat ti lalaki a gammatan na daytoy.
Kunana a gapo ti pannakakigtot na ket saan a nakapukkaw no diket nangpidot ti bato ken binakal na ti lalaki, ngem nakataray met laeng daytoy.
Indiskribir na ti lalaki a saan unay a natayag, saan a nalukmeg, naka-tshirt ti puraw ken naka-short ti blue.
Kabayatanna, inpetteng ni Mejica a no makita na ti motorsiklo a nagluganan ti lalaki a nanggandat a mang-harras kenkuana ket mailasin na.
Segun kenni Mejica, ti timek ti lalaki ket arig na taga-Bacarra met laeng.
Inbatad na nga awan ti sabali a taon ken awan ti naimuntar a CCTV iti nakapasamakan daytoy.
Gapo iti daytoy, naopan nagpa-blotter ni Mejica ken adda ti inpa-fill up ti PNP-Bacarra kenkuana.
Kunana a ditoy na met a naamoan nga adda pay ti taga-Barangay 6 iti nasao met laeng nga ili a kapada na nga adda ti nanggandat a lalaki.
Binalakadan ni Mejica dagiti babbai nga agridam ken saan a basta agtalek nangruna no saan da nga am-ammo dagiti agdamdamag.
