LAOAG CITY – Maysa ti natay ken lima ti nasugatan kalpasan ti pannakadesgrasya da iti Barangay Abaca iti ili ti Bangui.
Segun kenni Police Captain Ireneo Sibucao, ti chief of police ti Philippine National Police iti ili ti Bangui, ti natay maysa a babai, agtawen ti 29 a residente iti Barangay Cabangaran iti ili ti Vintar.
Inbatad na a ti driver ket agtawen ti 40, a taga Barangay Poblacion 2 iti ili ti Pagudpud ken karaman kadagiti pasaheros na ket agtawen ti 16 a babai, agtawen ti 19 a babai, lalaki nga agtawen ti 21, babai nga agtawen ti 38 ken agpapada dagitoy a residente iti Barangay Cabangaran iti met laeng ili ti Vintar.
Inlawlawag na a basar iti imbestigasyon da, kabayatan nga agpaabagatan da iti paset ti Bypass road ken napukawan ti kontrol iti manibela ti driver ken ginandat na ti agpreno.
Nupay kasta, naidungpar dagiti biktima iti concrete pedestal isut gapo na a nagsagaba da ti sugat iti nagduduma a paset ti bagi da.
Kunana nga immabot iti 20 a minutos ti rescue and recovery operation gapo ta napupok iti behikulo ti driver.
Naitaray dagiti biktima iti Bangui District Hospital ngem naideklara a pimmusay ti agtawen ti 29 ken dagiti nasugatan ken naiyakar iti Mariano Marcos Memorial Hospital and Medical Center iti ciudad ti Batac.
