LAOAG CITY – Inbatad ni Mr. Marvin Ganal, mangidadaulo iti Municipal Disaster Risk Reduction and Management iti ili ti Sarrat nga agtultuloy ti naiget a panagmonitorda kadagiti amin a barangay iti nadakamat nga ili tapnu malapdan ken maliklikan ti nakaro nga epekto ti Bagyo Kristine.
Kinunana a kangrunaan a banbantayanda ket dagiti barangay a maibilang kas high risk area pakairamanan ti Brgy. 21, Brgy. 22 ken Brgy. 23 no sadinno dagitoy ti kangrunaan a nalayos gapu iti idududprak ti Bagyo Julian ditoy probinsiya idi kallabes.
Malaksid iti daytoy, inpettengna a nakasaganan dagiti pagadalan ken ti Sarrat Civic Center nga agserbi kas evacuation center no ada dagiti residente a maapektaran.
Innayonna a naka-preposition dagiti heavy equipmentsda kas iti back hoe, dump truck ken rescue vehicles.
Kabayatanna, namnamaenna nga iti baet ti panagsagsaganada ket saan nga agbalin a nakaro ti epekto ti Bagyo Kristine gaputa patienna a mabalin a kumaro dagiti nadadel slope protection ti nasao nga ili gubuay pay laeng ti Bagyo Julian.
