LAOAG CITY – Manamnama ti panangipatungpal ti Metro Manila Development Authority wenno MMDA ti panangipaiget ti trapiko ken kadagiti aktibidad kas paset ti panagsagsagana iti panangidaulo ti Pilipinas iti maika-49 nga Association of Southeast Asian Nations weno ASEAN Summit.
Manipud Oktubre 24 agingga Nobiembre 20, temporario a masuspenso ti panangi-isyu ti ahensia ti pammalubos para kadagiti fun-run, motorcade, prusision ken dagiti dadduma pay nga aktibidad iti Manila, Pasay, Parañaque, Makati ken Taguig.
Kalikagumna daytoy a maliklikan ken makontrol ti trapiko kabayatan a maisagsagana dagiti lugar ken kalsada a mausar para iti regional summit.
Malaksid iti daytoy, manipud Oktubre 24, manamnama pay ti pannakaipatungpal ti pannakaipaiget iti Philippine International Convention Center ken iti Cultural Center of the Philippines Complex, pakairamanan payen ti full lockdown intono Nobiembre 7.
Maipatungpal pay ti moratorium kadagiti road works iti Metro Manila manipud alas-12 ti parbangon ti Nobiembre 1 agingga alas-12 ti parbangon ti Disiembre 23.
Kabyatanna, manamnama ti iyuumay ditoy pagilian dagiti delegado para iti ASEAN Summit iti umuna a domingo ti Nobiembre.
