LAOAG CITY – Pabor ni Mayor Michael Marcos Keon a maiyuswat ti Balikatan Exercises iti Brgy. Lapaz ditoy siudad ti Laoag.
Segun kenkuana, ti rason no apay ipalubosna a maisayangkat ti nasao nga aktibad ditoy siudad ket rumbeng nga irespetar dagiti tattao ti Republic of China ti teritorio ken integridad ti Republic of the Philippines.
Inbatadna nga adun dagiti inar-aramid ti China a saan a napintas kas ti panang-harass kadagiti Pilipino a mangngalap pakairamanan ti Philippine Coast Guard nga adda iti paset ti West Philippine Sea.
Gapu iti daytoy, inlawlawagna a masapol ti panangipatulod ti mensahe iti China tapno ipakita kadakuada a masapol ti panangrespetarda iti maritime waters ti pagilian.
Kunana a saan a ti China ti isyu no di ket ti Chinese Government a kasapulan ti nasaysayaat a panangipatungpal kadagiti addang ti gobierno.
Mainaig iti daytoy, kuna ni Mayor Keon nga iresrespetarna ti China nangruna ket adda dagiti panagbisitana iti China iti kallabes kaduana idi ti dati nga Ilocos Norte Governor ngem itan Presidente Ferdinand Bongbong Marcos Jr. no sadino napanda iti Shandong Province iti nasao a pagilian.
Inpakaammona a dumanon iti 16 a ribu a Philippines ken United States troops ti makipaset iti war games.
Innayonna nga iti napalabas a tawen ket adda ti naisayangkat a sisterhood agreement kaduada ti Huangshan City.
Maipalagip a nangrugin ti kadakkelan a Balikatan joint military exercises 2024 iti nagbaetan ti Armed Forces of the Philippines ken United States military idi kalman.
