LAOAG CITY – Nagdinnungpar ti maysa a motorsiklo ken multi-cab iti paset ti Pinili-Nueva Era Road kangrunaanna iti AVCI General Merchandise iti Brgy. Pagdilao iti ili ti Pinili.
Nabigbig ti driver ti motorsiklo a Mio Sporty nga agmaris ti nangisit a ni Ponciano Daguimol Jr., agtawen iti 47, naasawaan, mannalon ken residente ti Brgy. Aglipay iti nasao nga ili idinto a nabigbig met ti nangiturong ti Suzuki Multi-cab nga agmaris ti yellow a ni John Melvin Liiwag, agtawen iti 24, awanan asawa, delivery driver ti GUB Corporation ken residente ti Brgy. Salanap iti ili ti Pinili.
Basar iti imbestigasion, nag-U-turn ti multi-cab nga agturong nga agpa-daya ngem saanna a ninamnama ti sumungsungad a nakamotorsiklo nga agturong met nga agpa-laud a nangitunda ti panagdinnungparda.
Gapu iti daytoy, natukkol ti akin-kannawan a tumeng ti driver ti motorsiklo a naitaray iti Corpuz Clinic and Hospital idiay Sinait, Ilocos Sur para iti naan-anay a pannakatamingna ngem saan a nagbayag ket naiyakar daytoy iti Mariano Marcos Memorial Hospital and Medical Center iti siudad ti Batac idinto a saan met a naan-ano ti nangiturong ti multi-cab.
Iti agdama, agtultuloy pay laeng ti maiwaywayat nga imbestigasion maipapan iti nasao a desgrasia.
