LAOAG CITY – Inbatad ni Mrs. Cherrie Joy Garma, ti Information Officer iti Deped-Ilocos Norte a nasayaat ti pannakaimplementar ti inawagan na a progressive face to face classes.
Daytoy ket gapo ta dumurdur-as dagiti pagadalan a mapalpalubusan a mangisayangkat ti face to face classes ditoy probinsya.
Segun kenni Garma, manipud iti siyam a pagadalan iti DepEd Division of Ilocos Norte a karaman iti pilot face to face classes ken nanayunan pay daytoy.
Kunana nga iti Division of Ilocos Norte, umaboten iti 28 a pagadalan ti mangiyus-uswat ti limitado a face to face classes.
Karaman kadagiti sumagmamano a pagadalan a karaman iti pannakaisayangkat ti face to face classes ket manipud iti Burgos, Pagudpud, Adams, Nueva Era, Pasuquin, Piddig, Vintar ken Carasi.
Inlawlawag na pay a ti maysa kadagiti kangrunaan nga agdesisyon no makipaset dagiti estidyante ket dagiti nagannak kadakuada.
Mainaig iti daytoy, inbatad na a basar iti datos manipud iti Divison Office, umabot iti 189 a pagadalan ti manarimaan ti panagsagana da para kadagiti maisubmitir a dokumento tapno mapalubusan da a mangisayangkat ti face to face classes.
Kabayatanna, kinumpirmaran ni Garma nga iti baet ti pandemya ket ngimmato ti enrollees iti division ti Ilocos Norte.
