LAOAG CITY – Naisayangkat ti search warrant operation iti balay ni dati a Konsehal William Peralta iti Barangay 29. San Juan, Pasuquin, Ilocos Norte tapno biruken da ti maysa a shotgun.
Nupay kasta, iti panagsukisok dagiti otoridad iti balay ni Peralta ket awan ti nabirukan da a shotgun no di ket ado a bala ti nagduduma ti klase na a paltog.
Nakakumpiskar dagiti otoridad iti uneg ti balay da Peralta ti maysa a balay ti 50 cal, tallo a bala ti 60 cal., tallo a bala ti 7.78, 11 a bala ti shotgun, 10 a bala ti 9mm, maysa a a bala ti ca. 45, 6 a bala ti 32 revolver ken maysa a bala ti M16.
Immunan nga inadmitir ni Peralta nga adda ti paltog na a 9mm pistol, nga addaan ti maysa a magazine nga adda karga na a 10 a bala a napanna insuko iti kwerpo ti pulisya sakbay a naisayangkatan ti operasyon.
Iti eksklusibo nga interview ti Bombo Radyo Laoag ken ni Peralta, inbatad na a dagiti nakumpiskar nga ado a bala iti uneg ti balay da ket isu dagiti inbati dagiti kameng ti CIDG idi damo nga naisayangkatan ti search operation, addan sumagmamano a tawen ti napalabas.
Kuna na nga idi immuna a naisayangkatan ti operasyon ket saan nga innala dagiti otoridad dagiti nasao a bala gapu ta nakita da a saanen nga agputok dagitoy.
Innayon na a saanna nga ammo no ania ti rason nga insayangkatan da manen ti operasyon.
Mamati nga ado dagiti maap-apas kenkuana gapu ta professional amin nga annak na, malaksid pay ti kinagaget na.
Kabayatanna, kinumpirmaran ni Police Lt. Ralph Dayag, ti chief of police iti ili ti Pasuquin a nabayagen nga expired ti lisensya ti paltog ni Peralta.
Innayon ni Dayag a ti possible a sangwen a kaso ni Peralta ket panaglabsing ti Republic Act (RA) 10591 wenno Comprehensive Firearms and Ammunition Regulation Act.
