LAOAG CITY– Inadmitir ni Barangay Kagawad Gilbert Asuncion iti Barangay 33-A, Lapaz ditoy ciudad ti Laoag a nabayagen a problema da ti kaadda latta dagiti mapan agibelleng ti basura na iti igid ti kalsada iti masakupan da a barangay.
Kuna na nga uray ti napalabas nga administrasyon ket daytoy iti ti problema na.
Reaksyon daytoy ti barangay kagawad kalpasan nga adda manen dagiti basura a naibelleng iti igid ti kalsada iti barangay da.
Inlawlawag na nga adda ti dati a pagbasuraan iti lugar ngem pinagaboran da.
Nupay kasta, ado latta dagiti mapan agibelleng ti basura na iti nadakamat a lugar iti baet a mamindua iti kada lawas nga adda ti mapan agbunag ti basura iti barangay da.
Nadismaya ni Asuncion gapu ta ado latta dagiti natangken ti ulo na a saanna nga ammo nga ibelleng dagiti basura da iti umiso a lugar.
Innayon na a tunggal sabado ket napagnunumoan da nga agdalos da iti barangay da tapno masigurado a nadalos iti aglawlaw.
Inpakaammo ni Asuncion a pagsasaritaan da iti sumaruno a sesyon da dagiti mabalin a maaramid tapno awanen dagiti basta agibelleng ti basura na iti masakupan da a barangay.
Kabayatanna, naglikudan ni Mr. Marlon Asuncion Jr.,ti dati a Sang Kabataang chairman iti Brgy. 32-A, Lapaz ditoy ciudad ti Laoag a kukua na dagiti nasarakan a nagawangan iti parcel iti nadakamat a barangay.
Inaramid daytoy ni Asuncion kalpasan a nadukatalan dagiti opisyal ti barangay a kaadwan kadagiti nagawangan a parcel ket nakainagan kenkuana .
Inpasingked ni Asuncion a no agibelleng kadagiti nagawangan na ti parcel na ket ikkatten na tay sticker a nakailanadan iti personal information na.
Innayon na a saan nga agibelbelleng iti basura iti pagdalanan iti pamilya Farinas.
Basar pay kenkuana, dagiti basura da ket ibelbelleng da iti pagbasuraan nga inaramid da iti asideg iti pagtaeng ti lola na.
Immunan nga inbatad ti Barangay Council iti nadakamat a barangay a pagsasaritaan da iti sumaruno a sesyon da no ania ti kasayaatan a maaramid mainaig iti daytoy a banag.
